Allt skólastýrunni að kenna! Klárlega vanhæf.

Langt síðan ég hef kíkt inná þessa síðu, en jæja.

 

Hérna eru nokkrar tilvitnanir frá netverjum:

"Ég held líka að þarna hafi einhver starfsmaður skólans ekki verið á réttum stað á vaktinni sinni."

 "Skólastjórinn vildi þöggun og það er skelfilegt."

"Mér finnst högg og spark bardagaíþróttir( box,kickbox,karate, taekwando) miklu tvíeggjaðri..."

"...ætti að banna honum að stunda þessa íþrótt."

"Er hún hæf?"

"og að sjálfsögðu hefur gaurin notað tækni ur nefaleika íþróttinni ekki spurnig."

"Skólastýran ætti að finna sér annað djobb"

 

Það er eiginlega fáránlegt að ég geti varla fundið í fljótu bragði netverja sem tala ekki í þessa áttina. Allir vilja kenna öðrum um, fá fram harðari reglur og svo framvegis.

 --------------

Ég tala af reynslu þegar ég fullyrði að svona alvarleg slagsmál koma fyrir nokkrum sinnum á ári í hverjum einasta grunnskóla landsins.  Á mínum grunnskólaárum gerðist ég meðal annars sjálfur sekur um að brjóta tönn í öðrum nemanda. Svona gerist og aukið eftirlit og réttindaskerðing nemenda er ekki á leiðinni að koma í veg fyrir þetta. Við getum litið á suma bandaríska grunnskóla sem dæmi um afleiðingar frekari reglna og réttindaskerðinga.

Aumingja skólastjórinn er auðvitað sjokkeruð yfir athyglinni sem þetta mál hefur fengið. Þótt svona atvik komi upp oft í hverjum einasta grunnskóla lenti þetta í fjölmiðlum og hún höfð að skotmarki. Eðlilega er hún ekki sátt.

-------------

 Svo þegar menn eru búnir að sletta úr pytti reiði sinnar yfir skólastýruna kemur að boxinu. Það er eins og fólk haldi að það að strákurinn æfði box hafi eitthvað með árásina að gera. Halda menn virkilega að ef hann kynni ekki að boxa hefði árásinni bara verið hætt og fórnarlambið fengið að labba í burtu?

-------------

Svo er það einna merkilegast, að allstaðar er talað um þetta eina tilvik eins og það sé allt sem skipti máli. Að líkamleg meiðsli fórnarlambsins í þessari einu árás sé það sem þarf að sporna gegn. Einelti er langtíma vandamál og skaðinn sem hefur verið unninn í gegnum tíðina á andlega heilsu fórnarlambsins er svo langt um verri en brotin tönn og tímabundinn heyrnarskaði. Fórnarlömb eineltis enda oft uppi andlega sködduð fyrir lífstíð. 

 

Takk fyrir.

 

Blóðug slagsmál skóladrengja

Athugasemdir

[Þórarinn Jóhann Jónsson (IP-tala skráð) 3.3.2009 kl. 17:35]

Sæll ungi maður!

Mikið er ég innilega sammála þér.  Mig langar til að benda þér á það sem ég skrifaði um málið og viðbrögðin við því, þú finnur greinina á blogginu mínu.

 Með kveðju og hvatningu til að halda áfram þínu striki í sjálfstæðri hugsun.

[jóhanna (IP-tala skráð) 3.3.2009 kl. 17:37]

sæll... já mér finnst ömurlegt hvernig ráðist er á skólastýruna okkar,hún er fyrirmyndar skólastýra tekur vel á öllum málum sem koma upp
ég á 3 börn í þessum skóla og þekki vel til.En er sammála að þetta kemur ekki vel út í viðtali en það getur verið stress

[Jóhannes Ingibjartsson (IP-tala skráð) 3.3.2009 kl. 22:00]

"Ég tala af reynslu þegar ég fullyrði að svona alvarleg slagsmál koma fyrir nokkrum sinnum á ári í hverjum einasta grunnskóla landsins"

Bull. Ég minnist þess ekki að nokkurntímann á grunnskólagöngu minni, hafi tönn verið slegin úr skólabróður mínum, nef hans brotið, heyrn hans sködduð og honum gefinn heilahristingur, þaðan af síður út af þjóðerni hans. Nett tannbrot er kannski ekkert rosa mál, en þegar strákur kemur svona alvarlega skaðaður úr skólanum vegna þess að hann er aðfluttur, finnst mér eitthvað vera að.

"Aumingja skólastjórinn er auðvitað sjokkeruð yfir athyglinni sem þetta mál hefur fengið. Þótt svona atvik komi upp oft í hverjum einasta grunnskóla lenti þetta í fjölmiðlum og hún höfð að skotmarki. Eðlilega er hún ekki sátt."

Ætti hún ekki að vera vön því að tala opinberlega, verandi skólastjóri og allt það? Að segja svo að þetta hafi verið blásið upp finnst mér alveg fáránlegt, ástæður þess útlistaði ég hérna fyrir ofan.

"Svo þegar menn eru búnir að sletta úr pytti reiði sinnar yfir skólastýruna kemur að boxinu"

Það er bara einfaldlega svoleiðis að það eru krakkar, strákar aðallega, sem fara í svona íþróttir til að læra að slást. Smassa þessa gaura með "kjaft" á pizza pronto þegar Sólon lokar eða taka aðeins í "pollana" í skólanum. Ég þekki svona lið og er með því í skóla. Ég er alls ekkert frá því að boxið hafi átt þátt í þessu, eða þá að hann hafi farið í boxið til að geta fengið útrás fyrir einhverja minnimáttarkennd í skólanum.

Ég er hinsvegar hjartanlega sammála þér um andlegt ofbeldi og kaupi það heldur ekki alveg að þarna hafi ekki verið um einelti að ræða. Að minnsta kosti var verið að skjóta á hann vegna þjóðernis til að byrja með eða svo sagði allavega skólastýran í viðtalinu við mbl.

[Karl Emil Karlsson, 3.3.2009 kl. 23:14]

Það var kannski heldur bratt hjá mér að segja "hverjum einasta grunnskóla", þar sem ég get auðvitað bara vottað fyrir það sem ég veit af eða hef öruggar heimildir fyrir, sem eru bara nokkrir skólar á landinu. Ég var hinsvegar oftar en einu sinni vitni af því að fórnarlambið hafi hlotið tannbrot, nefbrot og heilahristing í sömu barsmíðunum þótt ég hafi aldrei heyrt um heyrnarskaða. Ég hef líka fylgst svolítið með eineltismálum í grunnskólunum og Olweusaráætluninni þannig ég hef kannski heyrt meira af þessu en meðaljóninn.

Þetta leiðir svo að punktinum um að blása upp málið í fjölmiðlum. Ég er ekki að segja að þetta sé of léttvægilegt til að það eigi að fá umfjöllun, heldur frekar að benda á að það misræmi að fjalla um þetta frekar en öll önnur svipuð og alveg jafn alvarleg mál sem eru alltaf að koma upp.

Og þú talar um að "kaupa" það að það sé ekki um einelti að ræða. Það er enginn að halda öðru fram, öllum er sama. Það sem mér finnst fáránlegt er að öllum er bara nákvæmlega sama um eineltið þegar líkamsárás af þessum skala er annarsvegar. Samkvæmt því sem ég hef kynnt mér og kynnst af eign raun þá er langvarandi einelti andlega margfalt skaðlegra en margt sem er tekið mun alvarlegra á, svo sem nauðganir, líkamsárásir eða fíkniefnamál, án þess þó að vera að gera lítið úr þeim harmleikjum. 

Varðandi boxið, ég þekki líka til unglinga sem hugsa um slagsmál sem prýðis föstudagsgaman. Reyndar þekki ég engan sem æfir bardagaíþrótt í þeim tilgangi að eiga auðveldara með að berja aðra en auðvitað neita ég ekki að þeir séu til. En helduru að þeir væru ekki alveg eins að berja mann og annan þrátt fyrir að fá ekki að æfa box? Það er aðeins flóknara en virðist að draga ályktanir í orsaka- og afleiðingaferli sem þessu. Ég mæli með að fordæma ekki heldur reyna að kynna sér aðeins málin og ekki fara að skerða réttindi fólks fyrr en orsakasamhengið er komið á tært og sannað þykir að áhrifin eru nógu sterk til að réttlæta frelsisskerðinguna sem ég stórlega efa.
Og svona til að bæta við: Á meðal manna í "bardagalistasamfélaginu" þykir box ekki mjög praktísk bardagaíþrótt. Í raunverulegum slagsmálum eru menn yfirleitt of þétt upp við hvorn annan til að kýla af einhverju afli og hlutir sem eru bannaðir í boxi, svo sem hnéspörk, andlitspot og lásar skipta meira máli.

Enn einu sinni vitna ég svo í Benjamin Franklin í lok póstsins míns: "Þeir sem myndu gefa réttindi sín fyrir lítið tímabundið öryggi eiga hvorki skilið réttindi né öryggi."

[Baldur Blöndal, 15.4.2009 kl. 03:19]

Íþróttir þar sem mikið er slegist getur hjálpað til við að losa út spennu og reiði, ef hún er stunduð í hæfilegu og eðlilegu magni.

Annars ætti að reyna að slappa smá af eins og Kalli segir, annars stefnir þetta allt í að við kaupum málmleitartæki til að passa að krakkar komi ekki með byssur í skólana annars er einelti mikið verra en eitthvað líkamlegt